Angerlarsimaffik
Pakkutap ilisaritinnera.
Angerlarsimaffik
Pakkutaq
annertuumik isumassorneqarnermikkut sumiginnakkanut meeqqanut inuusuttuaqqanullu qatanngutigiinnut angerlarsimaffiuvoq 6-17-nik
ukiulinnut. Aammalu pisariaqartitsineq aallaavigalugu ukiukinnernik
najugaqartoqarsinnaalluni.
Illutaa quleriit pingasunut
aggugaavoq, qullermi meeqqanut 5-nut inissaqarpoq, qiterlermi meeqqanut 4-nut allerlu assassortarfittut pinnguartarfittullu atorneqartarluni.
Pakkutami
meeqqat soqutigasaat aallaavigalugit
sammisaqartinneqartarput.
Timersoriaatsinik assigiinngitsunik aallutaqartarput.
Aasaanerani asimi
illuaqqamiittoqartarpoq.
Siunertaq
Angerlarsimaffik Pakkutami
siunertaavoq, meeqqat toqqissisimasumik
angerlarsimaffeqarlutik
ineriartortinneqarnissaat. Qatanngutigiittut
ataqatigiinneq, ikioqatigiinneq,
ataqqeqatigiinneq, tatigeqatigiinneq,
tapersersoqatigiissinnaanermillu
peqarlutik ineriartorsinnaanissaannik
ilinniartissallugit.
Tassani aamma
ilaapput kisimiillutik qatannguteqaratik
najugaqartut taamatut
sungiusartinnissaat.
Meeraq
nammineersinnaasoq, akisussaaffimmik tigusisinnaasoq, siunissami
sorusunnerluni takorluuisoq,
pilersinnissaa siunertaraarput. Meeqqap pikkoriffii
inuttaanut ersarissartuarnissai, qanorlu atorluarsinnaanissaanik
aqqutissiuuttuarnissaa siunertaavoq, kiisalu aamma sanngiiffiisa
nukittorsarnissai.
Meeqqap
killiffia aallaavigalugu ineriartortitsineq siunertaavoq
pingaartinneqarlunilu. Atuagarsornikkut inuttullu piginnaasat
ataqatigiissumik
sapinngisamik ineriartortinnissaat siunertaavoq.